Les Chroniques de Sire Jean Froissart/Livre I, Partie I/Chapitre CIV
CHAPITRE CIV.
Après la destruction d’Aubenton, ainsi que vous avez ouï, s’acheminèrent les Hainuyers et leur route devers Maubert-Fontaines. Sitôt qu’ils y parvinrent, ils la conquirent, car il n’y avoit point de défense ; et la pillèrent et robèrent, et depuis l’ardirent : après, la ville d’Aubencueil, et Segny le grand[1] et Segny le petit, et tous les hameaux et villages de là environ, dont il en y eut plus de quarante. Ainsi se coritrevengèrent à ce commencement les Hainuyers des dommages que on leur avoit faits, tant en la terre de Chimay, comme à Haspre. Mais depuis les François leur firent cher comparer, si comme vous orrez avant en l’histoire ; mais que vous le veuilliez lire ou écouter.
Depuis cette chevauchée faite, le comte de Hainaut se traist devers la ville de Mons et donna congé à toutes manières de gens d’armes, et les remercia grandement et bellement chacun de son bon service ; et fit tant que chacun se partit bien content de lui et s’en ralla chacun en son lieu.
Assez tôt après il vint en volonté et propos audit comte d’aller ébattre en Angleterre et faire certaines alliances au roi d’Angleterre son serourge, pour être plus fort en sa guerre ; car bien pensoit et disoit que ainsi la chose ne pouvoit demeurer, que le roi son oncle ne fît aucune armée contre lui ; et pour être plus fort, bon lui sembloit et à son conseil aussi, qu’il eût l’amour et l’alliance des Anglois, des Flamands et des Brabançons. Si manda ledit comte tout son conseil à Mons en Hainaut, et leur remontra son entente ; et ordonna et institua là son oncle à être baulx et gouverneur de Hainaut, de Hollande et Zélande ; et se partit depuis assez tôt, à petite menée, et vint à Dourdrech en Hollande ; et là monta en mer, pour arriver en Angleterre.
Or nous tairons-nous à parler du comte de Hainaut, et parlerons des besognes de son pays, et des avenues qui y avinrent tandis qu’il fut hors.
- ↑ Signy-le-Grand est vraisemblablement le village construit autour de l’ancienne abbaye de ce nom, entre Rethel et Rocroy. Signy-le-Petit est au sud-ouest de cette dernière ville, à une très petite distance.