Les Chroniques de Sire Jean Froissart/Livre I, Partie I/Chapitre CV
CHAPITRE CV.
Vous avez bien ouï recorder comment messire Jean de Hainaut demeura baulx et gouverneur de trois pays, par l’ordonnance du comte. Si obéirent en avant tous les barons et les chevaliers et les hommes des dessus dits pays à lui comme à leur seigneur, jusques à son retour. Si se tint ledit messire Jean de Hainaut en la ville de Mons, et pourvéy le pays, et garnit bien et suffisamment de toutes bonnes gens d’armes, espécialement sur les frontières de France ; et envoya quatre chevaliers en la ville de Valenciennes pour aider à garder et conseiller la ville, les bourgeois et la communauté. Ce furent le sire d’Antoing, le sire de Wargny, le sire de Gomignies, et messire Henry de Husphalise ; et envoya le sénéchal de Hainaut messire Girard de Werchin, atout cent lances de bonnes gens d’armes, en la ville de Maubeuge, et mit le maréchal de Hainaut messire Thierry de Wallecourt en la ville du Quesnoy et le seigneur de Potelles en la ville de Landrecies. Après, il mit en la ville de Bouchain trois chevaliers allemands, qui tous trois se nommoient messire Conrart, et envoya à Escandeuvre messire Girard de Sassegnies, et aussi en la ville d’Avesnes le seigneur de Fauquemont, et aussi par toutes les forteresses de Hainaut, voire sur les frontières du royaume ; et pria et enjoignit à chacun de ces capitaines qu’ils fussent soigneux pour leur honneur d’entendre à ce qui leur étoit enchargé ; et chacun lui enconvenança. Si se traist chacun sire et capitaine avec ses gens en sa garnison, et entendirent de mettre en point, garnir et pourvoir ce dont ils étoient gardes. Or reviendrons-nous au roi de France, et recorderons comment il envoya une grand’chevauchée de gens d’armes en Hainaut pour ardoir et exiller le pays, et en fit le duc de Normandie son fils chef.