Les Chroniques de Sire Jean Froissart/Livre I, Partie I/Chapitre CVI
CHAPITRE CVI.
Quand le roi de France eut ouï recorder comment les Hainuyers avoient ars au pays de Thiérasche, pris et occis ses chevaliers et écuyers, et détruit sa bonne ville d’Aubenton, sachez qu’il ne prit mie cette chose en gré, mais commanda à son fils le duc de Normandie, qu’il mît une grosse chevauchée sus, et s’en venist en Hainaut, et sans déport atournast tel le pays que jamais ne fut recouvré ; et le duc répondit qu’il le feroit volontiers. Encore ordonna le roi de France le comte de Lisle[1], Gascon, qui se tenoit adonc à Paris de-lez lui, et que moult aimoit, que il mît une grosse chevauchée de gens d’armes sus, et s’en allât en Gascogne, et y chevauchât comme lieutenant du roi de France, et guerroyât durement et roidement Bordeaux et Bordelois, et toutes les forteresses qui là se tenoient pour le roi d’Angleterre.
Le comte dessusdit obéit au commandement du roi, et se partit de Paris, et fit son mandement à Toulouse à être à Pâques closes[2] ; lequel mandement fut tenu, ainsi que vous orrez ci-après quand lieu et temps sera. Encore renforça grandement le roi de France l’armée qu’il tenoit sur mer, et la grosse armée des écumeurs, et manda à messire Hue Kieret, à Barbevoire et aux autres capitaines qu’ils fussent soigneux d’eux tenir sur les mettes de Flandre, et que nullement ils ne laissassent le roi d’Angleterre repasser, ni prendre port en Flandre ; et si par leur coulpe en demeuroit, il les feroit tous mourir de male mort.
Avec tout ce vous avez bien ouï recorder comment de nouveau les Flamands étoient alliés et conjoints par scel avec le roi d’Angleterre, et lui avoient juré à lui aider à poursuir sa guerre, et lui avoient fait encharger les armes de France ; et cil roi les avoit absous et clamés quittes d’une grand’somme de florins dont ils étoient de jadis obligés et liés au roi de France. Dont il avint que, quand le roi Philippe ouït ces nouvelles, si ne lui plurent mie bien, tant pour ce qu’ils avoient fait hommage à son adversaire, comme pour ce que le roi anglois, comme roi de France, les avoit quittés de la somme et de l’obligation, ce que nullement il ne pouvoit faire. De quoi encore, pour eux retraire, il leur manda par un prélat, sous l’ombre du pape, qu’ils tinssent ferme et estable leur serment, autrement il jetteroit sentence contre eux ; mais nonobstant ce et la petite et foible information qu’ils avoient eue, si ils se vouloient reconnoître et retourner à lui et à la couronne de France, et relenquir ce roi d’Angleterre qui enchantés les avoit, il leur pardonneroit tous mau-talens et leur quitteroit la dite somme, et leur donneroit et scelleroit plusieurs belles franchises en son royaume. Les Flamands n’eurent mie adonc conseil ni accord de ce faire ; et répondirent qu’ils se tenoient bien pour absous et pour quittes de tout ce où obligés étoient tant comme au roi de France. Et quand le roi de France ouït et sçut qu’il n’en auroit autre chose, il s’en complaignit au pape Clément VI[3] qui régnoit pour le temps, lequel pape jeta une sentence et un excommuniement en Flandre si grand et si horrible, qu’il n’étoit prêtre qui y osât célébrer ni faire le divin service. De quoi les Flamands furent moult courroucés, et envoyèrent complaintes grands et grosses au roi anglois ; lequel, pour eux appaiser, leur manda que de ce ils ne fussent néant effrayés, car la première fois qu’il repasseroit la mer, il leur mèneroit des prêtres de son pays, qui leur chanteroient des messes, voulût te pape ou non, car il est bien privilégié de ce faire. Parmi ce s’appaisèrent les Flamands.