Ja ne me veront mès a nul jor desosiel,
Car Sarrasin m’ont mort, ochis et detranchié.
— Sire, » che dist li leres, « non ferai, par mon cief :
Ja mès ne vous faurai a nul jor desossiel. »
Quant Elies l’entent, mout l’en prist grant pitié,
L’aige de ses biaus ieus lés la fache li chiet.
Elyes li vassaus, qui seufre grant dolor,
Rapele Galopin douchement par amor :
« Galopins, biaus compains, por Dieu le creator,
C’or t’en fui, Galopin ; ore aproche li jor :
Sarrasin m’ochiront orendroit sans demor.
— Sire, » che dist li leres, « por Dieu que jou aour,
Je devi(e)ng vostre hon lige demain avra quart jor :
Par saint Denis de Franche, mieus voil morir o vos
Entre gent Sarrasine et souffrir grant dolor
Que repairier en Franche a joie et a baudor. »
Quant l’entendi Elies, forment l’en tient a pros.
Et Sarrasin s’en issent par son l’aube de jor ;
Bien en i ot .viixx. qui prissent lor adous,
Et vont querrant Elie li felon traitor ;
Mais nel troveront mi[e], se Dieu plaist le signor,
Qu’il l’ont laissiet ariere el vergier sous la tor.
Rosamonde s’estut sus el palais autor
Et vint a la fenestre por oir la douchour
Des oissellons menus qui chantoient al jor ;
L’euriel et la merle ot chanter sor l’aubor,
Le cri del rousingol, se li sovient d’amor :
« Vrais Dieus, » dist la pucele, « con tu es presious !
Tu fais croistre les arbres, porter foilles et flors,
Et le blé nous fais sourdre de la terre en amour,
Et en la sainte viergene presis anonsion,
Biaus sire, et sanc et char i presistes por nous.
