De la roïne nen a mais dit noient.
O les barons se tint d’ore en avant,
A la roïne plus ne vait en present ; (*)
Quar il conoist s’ire et son mautalent,
Ne li osast aler séoir devant.
Et la roïne le quiert et sil demant ;
Mais cil fu saiges, si se vait aloignant.
Qui li donast tot l’avoir d’Orient,
Ja ne l’iroit de cel jor en avant
Plus aparler ne faire son commant.
Et li cuivers est sempres en torment
Et traïson sempres vait porpensant.
Diex le confonde, li peres raemans ! (*)
Par lui fu mise la roine en grant torment, (*)
Com vos orrés, se estes atendant.
Li maus Macaires, li fel, li soduians,
Al nain s’en vient, si li dist en oiant :
« Hé ! nains, fait il, de toi sui je dolens
« Se as éu honte et encombrement ;
« Mais se volsisses ovrer à mon talent,
« De la roïne prendroie vengement :(*)
« Arse et bruïe seroit en feu ardent. » (*)
Et dist li nains : « Et autre ne demant.
