Page:Anonyme - Macaire, chanson de geste.djvu/255

La bibliothèque libre.
Le texte de cette page a été corrigé et est conforme au fac-similé.
724—746
63
Macaire.

O lui l’en mene, cui qu’en doie anuier,
Par le chemin si se mist à l’errer. (*)
Grant duel en menent péon et chevalier,
Li rois méismes o Naimon de Baivier.

Coment s’en vait Auberis.

Quant Auberis s’en vait si desevrant,
Grant duel en menent li petit et li grant ;
Li rois méismes en plore tenrement.
Et cil s’en vait par le chemin errant.
Quant voit Macaires que il en estoit tens,
A son ostel il s’en vient tot corant.
Cil le destruie qui forma Moïsant !
Por lui fu mise la roine en grant torment.
D’armes se vest et d’autre garnement,(*)
Si est monté desor un auferrant.
Prist une targe et al col se la pent,
Et en sa main une lance trenchant.
De Paris ist souef et belement,
Riere Auberi si vait il chevauchant.
Et cil s’en vait o la dame ensement ;
Ne se dotoit de persone vivant.
Las ! que li rois ne set l’encombrement
Que li ot fait li cuivers soduians.
Tant a erré Auberis en avant