« Dont puis en fu Macaires encorpés,
« Si com li chiens l’éust coilli en hé. (*)
« S’il vainc le chien, si soit il deslivrés ;
« Et si Macaires est dou chien afolés,
« De maintenant à mort soit il jugiés
« Come traïtre et malvais renoiés. »
Quant cil qui là sont al conseil privé
De Naimon oient coment il ot parlé,
Chascuns li ot sa parole gréé,
Ne nus n’en fu qui se traïst arier.
Li rois méismes bien li ot otrié.
Et de Macaire li parent en sont lié ;
Ne cuident mie li plais si fust alés
Que par un chien fust vaincus ne matés.
Joiant en sont li parent Ganelon
Quant oï ont le jugement Naimon ;
Ne cuident mie si alast la raisons
Qu’uns chiens péust mater un tel baron.
Et l’emperere qui Kallon ot à non
Ja n’en vout faire nule demorison.
Emmi la place, par devant le donjon,
Un grant plaissié a fait lever en son,
Moult bien serré entor et environ.
