Pois fa crier un bando, qe, s’el fose nul hon
Qe la pasese, sença redencion
Apendu ert à fors como laron ;
Çascun guardi la bataile in pax, sença tençon.
Adoncha li rois non fe arestason :
Tot primeran Machario prendon,
En guarnelo i le despoleron
E in sa man li dono un baston
Qe de un braço estoit voire lon ;
Elo no li n’oit nul autre guarison.
Quant a ço fato, in la stalea li meton,
E pois le mis le levrer, qi ne pisi o non.
Quant le levres fo dens, el se guarda environ ;
O vi Machario, el se core à randon.
Quando li can oit Machario véu,
Sovra li cor cun li denti agu
E por li flanco elo l’oit prendu.
E cil li oit cun li baston feru
Una gran bote e por flanco e por bu.
E cil a lu fer cun li denti agu.
Si grande fo la bataile, n’en fo maior véu.
Tota la jent qe in Paris fu
Por véoir la justisie sont à la plaça venu.
