Puis fait crier un ban : que, se nus hon (*)
Le trespassast, sans nule raençon
A forches ert apendus com larron ; (*)
En pais, sans noise, la bataille esgart on.
Adonc li rois ne fist arrestison :
Tot primerains Macaire cobré ont,
Sol en bliaut si despoiller le font
Et en sa main li donent un baston
Qui une brace avoit sans plus de lonc ;
Si nen ot il nule autre garison.
Quant ont ce fait, ens el plaissié mis l’ont,
Puis le levrier, qui qu’en poist o qui non.
Quant furent ens, li chiens garde environ ;
Où voit Macaire, là cort il de randon.
Quant ot li chiens Macaire apercéu,
Des dens agües li est sore coru (*)
Et par le flanc si l’a aconséu. (*)
E cil li ot dou baton referu(*)
Une grant bote et par flanc et par bu.
Et cil des dens agües l’a mordu.
Grans fu l’estor, n’en fu maior véus.
Tote la gent qui dedens Paris fu
Por la joutice véoir i sont venu.
