Sore li cort et si le vait cobrer,
Tot por l’avoir et deniers gaagner.
Devant le roi l’a en present mené. (*)
Li rois le voit, moult li fait à gréer ;
Les mile livres li a fait deslivrer.
Puis fait celui et prendre et loier ;
En celui lieu où il vout trespasser
Si le fait il par la gueule encroer,
Et en après et ardoir et brusler.
Grant duel en ont cil de son parenté ;
Mais por le roi ne l’osassent mostrer.
Et fu l’estors et si durs et si fiers
Nen est nus hom qui le péust conter.
A l’endemain dusques à l’avesprer
Si en dura l’estris et li joster.
Entre ambedeus fa la bataille grans ;
Maior ne vi nus hom el mont vivant.
Li chiens le mort par costés et par flans,
Et cil li done del baston moult sovent
Parmi la teste, si que en ist li sans.
Cil de Maience en sont en grant torment ;
Bien atrovassent pais que fust avenans
