Page:Anonyme - Macaire, chanson de geste.djvu/309

1373—1399

117

Macaire.

Bien cuident il que il soit forsenés.
La tierce nuit que furent hebergié,
S’agiut la dame d’un moult bel iretier. (*)
Et l’a l’ostesse en ses bras alevé,
Et si l’a bien et baignié et faissié.
De tote chose que li venist à gré
A son voloir a la dame aaisié.
Servie l’a ne plus ne moins à gré,
Come se fust de son droit parenté.
Et la roïne si li en sot boin gré.
Et Varochers vait avant et arier,
O le baston qu’il ot gros et quarré,
Et l’enfant guarde que il ne soit emblés
Ne que il soit fors d’illec emportés.
La dame jut el lit uit jors pasés
Com autres dames seulent par les cités ;
Puis quant ce vint qu’ele dust relever, (*)
Avec l’ostesse si estoit à parler,
Et li boins ostes s’en est vers ele alés.
« Dame, fait il, bien avés esploitié
« Quant nos avés un bel fil aporté ;
« Quant vos plaira que il soit bautisiés,
« Je vorroie estre vos comperes claimés. »
Dist la roïne : « Cent mercis en aiés ;
« De mon enfant ferés vo volenté :
« Nomer le faites com vos venra à gré. »
Dist Primerains : « Et l’ai bien porpensé ;