Page:Anonyme - Macaire, chanson de geste.djvu/323

1546—1573

131

Macaire.

« Icil traïtre qui me vout acuser
« Arier me vint, moult par ert bien armés ;
« Cel chevalier qui m’avoit à guier
« Si me l’ocist à l’espié amolé. (*)
« Quant je le vi, n’oi en moi qu’esfréer,
« Si m’enfuï ens el grant bois ramé, (*)
« Et celui homme qui si me vient derier
« Ai à l’issir de la selve atrové,
« Dont m’a il puis trosque ci compaignié.
« Et en tel lieu somes nos arivé
« Où somes bien servi et honoré,
« Et tot ice par la vostre bonté,
« Dont, gentis rois, et vos pri, en nom Dé,
« Ne me voilliés ainçois abandoner
« Que à mon pere soit mes estres mandés,(*)
« Qu’à grant honor m’avoit mari doné.
« Por moi vorra chevaliers envoier. (*)
« Et vos ai dit tote la verité. »
Li rois l’entent, tos en fu trespensés,
Et voit il bien qu’ele dit verité,
Que roïne est de la crestienté,
Et que ses peres Constantinoble tient. (*)
Moult hautement la vait il encliner.
« Dame, fait il, bien trovée soiés ! (*)
« Vos vorrai je en tel lieu osteler
« Où vos ferai servir et honorer
« Tant qu’à vo pere uns mes soit envoiés ;
« De vostre affaire bien li sera conté. »