Le roi d’Ongrie hautement merciant ;
Et si li offre son or et son argent.
Et son réaume et derier et devant.
Vont s’ent li mes baut et lié et joiant,
Et cil s’en vont qu’au roi mande ensement.
Tant sont alé parmi la mer najant
Que en Hongrie là vienent descendant.
Voit les li rois, ses aquieut gentement,
Honor lor fait et merveillos et grant.
Et cil le vont moult par regraciant
De ce qu’ot fait à lor dame vaillant.
Li rois d’Ongrie les aquieut richement
Com se porroit conter par nul semblant.
Et Blancheflor, la roïne des Frans, (*)
Quant les avise, contre lor vait corant ;
Bien les conoist, que il sont si parent.
De son pere a demandé erranment
Et de sa mere qu’ele paraime tant.
« Dame, font cil, de vos sont il dolent ;
« Par nos vos mandent il vos sont atendant.
« Or i venés, dame, atout vostre enfant. »
Et dist la dame : « Si me vient à talent. »
Page:Anonyme - Macaire, chanson de geste.djvu/335
Le texte de cette page a été corrigé et est conforme au fac-similé.
1686—1707
143
Macaire.
