Li rois d’Ongarie, li saço e li ber,
A li anbasaor el vait aincliner.
Tanto honor li fait como i fose son frer.
E à quela raine el fi robe taler
Como se convent, de palio e de çender,
Et ensement le fait à Varocher
Qe oit la dame à son justisier.
E li rois d’Ongarie, quando se vene à sevrer,
Tota soa galea el fait apariler
De tote quelle colse qe li avoit mester :
De pan e de vin, de carne da mançer.
Et in apreso quatro de ses çivaler
Elo fait richament coroer,
Qe quela dame ale à convoier.
En nave entrent quando volent naçer.
E cela dame, q’e tanto pro e ber,
Ven à li rois conçé à demander,
E à la raine, la bela al vis cler.
Non oblio mie Primeran son oster ;
Gran don li fe à lui et à sa muler.
Una colsa fe dont fo molto à loer :
