Page:Anonyme - Macaire, chanson de geste.djvu/343

1778—1804

151

Macaire.

« En avoutire l’a li rois atrové.
« Dont à vos, sire, me vout il envoier
« Que vos de rien ne vos esmerveillés
« Se il la fait par jugement mener. » (*)
Quant l’a li rois oï et escouté,
A grant merveille en fu esmerveillés.
Mais la roïne qui la nori souef,(*)
Qui de sa fille conoist cuer et pensé, (*)
Nen pot ester au message ait parlé :
« Mesagiers freres, le sens avés changié ;
« Bien conois cele qu’en mon ventre ai porté :(*)
« Ce que vos dites est trestot fausetés.
« Nen porroit estre por trestot l’or de Dé (*)
« Que moie fille tant osée ait esté
« Qu’à son segnor éust fait mauvaistié.
« Bien la puet on à grant tort encorper,
« Mais à droiture, n’est mie verités.
« Plus loiaus dame n’est en crestienté ;
« Mal fait li rois, quant la blasme, et pechié. »(*)
Dist l’emperere : « Mal avoit porpensé
« Quant vout ma fille rois Kalles encorper
« Tot por un nain, dont sui si abosmés
« Par un petit n’en ai le sens mué.
« A vostre roi, quant tornerés arier,
« De moie part vos si li conterés
« Que bien se gart et avant et arier
« Que à ma fille face nul encombrier ;