« Qe sana e vive ancora la veron.
« Mais, sel vos plait, tenpo nu atenderon
« Tanto qe altre novelle oldiron
« De la raine, s’ele e morta o non. »
Dist l’inperer : « A Deo benecion. »
« Enperer sire, ço dist N. de Baiver,
« Se à mon conseil vos volez ovrer,
« Tel vos donaro non ert da oblier :
« Ancora en Costantinopoli envoiaria mesaçer
« A celle rois dire e conter
« Cun la justisie avés fata si fer
« De Macharie, li traito lesençer,
« Qe soa file aloit acuser,
« Sença colpe me la fe sbanoier.
« Ne se poroit de la justise dire ne rasner,
« De soa file ren ne le pois derasner ;
« Ne le so pais dire ni conter
« Coment se posa avoir ni trover,
« Qe in le bois se aloit afiçer.
« E se de le vole medança demander,
« Parité estes de à lui delivrer
« D’or e d’avoir, e de besant e de diner. »
