Page:Anonyme - Macaire, chanson de geste.djvu/397

2404—2427

205

Macaire.

Et de bataille estoit moult engignos.
Quant il ot mort cel chevalier de Blois,
A sa gent dist : « Segnor, que faites vos ?
« Car me vengiés la bele Blancheflor
« Cui Kallemaines ot fait tel desonor ! »
Et cil le font, quant oent le contor.
Donc oïssiés des cous moult grant tabor. (*)
Et cil de France les fierent à estros ;
Donc véissiés un doleros estor ;
Maint chevalier en furent dou chief blos. (*)
Mar vist rois Kalles les cuivers traïtors
En cui tot jor mist son cuer et s’amor.
Cil de Maience et de lor parentor
Sempres li firent et honte et desonor.
Mais Damediex, li peres glorios,
Asés lor fist et honte et desonor
Qu’à male mort fist morir les meillors.
Li premiers fu dans Guenes li contors,
Cil qui traï les doze compaignons,
Rolant vendi, Berengier et Oton,
Et les vint mile qu’ocist Marsilions.
Mais por Macaire venue est tés tençons
Que crestien ont entr’eus tel pardon
Estorés n’ert par nesun home el mont.