D’ambedeus pars se fierent à bandon ;
N’en i ot nus, ne viels ne jones hon, (*)
N’éust sanglent le vermeil siglaton.
Grans fu la noise, li cris et la tensons
Et li damages, qui qu’en poist o qui non.
Et crestien tuit, en Dieu créant, sont ! (*)
Male fu l’ore et maléis li pons
Que cil Macaires onques nasqui el mont,
Que par soe oevre et sa fausse raison
Si en morurent à grant destrucion
Plus d’un millier, qui qu’en poist o qui non.
Dont Damediex li fist remission
De ses pechés, si ot confession.
Grans fu l’estors et merveillos et fiers,
L’uns rois o l’autre quant se vait encontrer.
Donc véissiés chéoir ces chevaliers,
L’un mort sor l’autre verser et trebuchier. (*)
Devant les autres chevauche Varochers ;
Bien fu armés sor un corant destrier.
Ne sanloit mie ce que il fu premier,
Quant ens el bois aloit à converser,
Qu’à la cordelle en menoit le sommier
