Page:Anonyme - Macaire, chanson de geste.djvu/425

2737—2763

233

Macaire.

Et dist dus Naimes : « Véés de cel maufé !
« Li vif diable l’ont por voir engenré.
« Dou branc d’acier tel cop me vint doner
« Desor mon elme que me fist embronchier
« Desor l’arçon de la sele derier.
« Diex me gari qu’en char nel pot fichier. »
Dist l’emperere : « Bien le puis je blasmer,
« Et croi por voir, se ne faut mes cuidiers,
« Cil soit li glous, li malvais pautoniers,
« Qui vint l’autrier me rober mon destrier.
« Me le resanle quant le voi chevaucher. (*)
« Mais, se me puis à lui aproïsmer,
« Chier li ferai à mon branc comperer ! » (*)
Et Varocher ne chaut de son tenser ;
Tote ore vait et avant et arier.
Emmi la voie, par delez un sentier,
Encontré a Berart de Mondisdier.
Et cil li done tel cop dou branc d’acier
Amont sor l’elme, qui luisans fu et clers,
[Que flors et pieres en fait jus craventer] ; (*)
Mais ne l’empire la monte d’un denier.
Et li redone si grant cop Varochers
Que il l’abat jus del corant destrier ;
O vueille o non, si l’a à prisonier,
O soi l’en mene, sans noise et sans tenser,
L’emperéor trosqu’el demaine tref.
A Blancheflor l’a doné à garder.