Et quant le puet la dame raviser, (*)
Bien conoist ele qu’il est ses chevaliers.
Li fait ses armes de maintenant oster
Et puis le fait vestir et conréer
De riches dras de paile et de cendel.
Et Berars prist la dame à esgarder ;
Quant la conoist, que la puet raviser,
Nen fust si liés por tot l’or de Baivier,
Et devant ele se vait engenoillier.
Et Blancheflor l’en a fait sus lever ;
La dame l’a delez ele asegié,
Et si li prist par raison demander
Coment le fait Kallemaines li ber.
« Dame, dist il, por vos est en penser ;
« Ja n’ose mais de vos rien esperer,
« Croit qu’estes morte sans point de recovrier. »
Berars parole qui ot joie moult grant
De la roïne à la chere riant.
Qui li donast trestot l’or d’Oriant,
Ja ne seroit si liés ne si joians.
« Dame, fait il, moult me vais merveillant
« Com de ceste oevre en poés sofrir tant :
