Page:Anonyme - Macaire, chanson de geste.djvu/437

2889—2915

245

Macaire.

De la bataille com il ert devisé.
Et chascuns l’ot otrié et gréé.
Et li Danois s’est premerains vanté
D’aler ou champ, se l’a li rois en gré. (*)
De maintenant en ont il conseillié ;
Li rois li a errant le gant doné.
De l’autre part si fu li amirés
Costantinoble qui tient et le regné.
A sa gent dist ce qu’il ot devisé
Avec le roi de crestieneté :
La bataille ert de dous sans plus el pré.
« Qui la fera ? » li rois a demandé.(*)
Chascuns escrie : « Varochers l’adurés. »
Et cil respont : « Bien fait à otrier. »
Grant joie en ot li rois et ses barnés.
La roïne ot la novele conter
Que la bataille gaigiée a Varochers,
S’a le gant pris vers le Danois Ogier.
Quant l’a séu, prist soi à porpenser,
Qu’ele en set bien tote la verité,
Qu’en tot le mont et devant et derier
Mieudre nen ert dou Danois atrovés
Ne plus hardis et de plus grant posté.
Sachiés por voir sans nule fauseté
Que Varocher ot loiaument amé :
Por l’aparler un mesage a mandé ;
Et cil i vient, ne l’ot pas trestorné.