Naimes parole trestot premierement.
« Drois emperere, dist il, à moi enten ;
« Voir vos dirai par le mien escient.
« Nule riens n’est en cest siecle vivant,
« Puis que faite est et a pris finement
« Qui retorner puist ariere en noient.
« Dont vos pri je, por Dieu l’omnipotent,
« Que à Kallon, qui est vostres parens,
« Li pardonés de cuer et de talent,
« Et sera il a vo comandement
« De vos servir, il et tote sa gens. »
Dist l’emperere : « Vos parlés saigement,
« Et vos vueil dire trestot apertement
« Quant alai primes ma fille mariant
« Je nen avoie ne ami ne parent
« Que tant amasse com Kallon loiaument.
« Or a ovré vers moi vilainement
« Et vers ma fille esploitié laidement (*)
« Quant l’a jugée à mettre el feu ardent.
« A grant tort fu encorpée et vieument ;
« Mais de tel chose que créés fausement
« Ne puis muer ne vos face saichant.
