« Se Deo m’oit ameo loialment,
« De ma fille vos diro li convent :
« Non est morte, ançi e viva e çoient.
« E se de ço vu fosi descreent,
« Veri li voir à le à mantinent. »
Alora dist à Varocher en rient :
« Varocher, dist il, vu si saço e valent ;
« Alez à Blançiflor, non demorés nient,
« Davant moi la menez al present,
« Si qe N. la voie e Oger ensement. »
Dist Varocher : « Vu parlé saçement. »
El se departe, non fait demorament,
Ven à la çanbre o ela estoit çeleament
Avec Bernard, de soto un paviment.
Dist Varocher : « Dama, ad esient
« E vos aporto un noble present.
« Vestre per v’invoie sençe demorament
« Venez à lui si açesmeament
« Qe de vos non açe blasmo de nient
« Qe avez eu nesun enoiament.
« Véoir vos vol de la françescha jent
« Uçer e Naimes, qe son vestre servent »
La dama l’olde, à Deo merçe ne rent.
Gran çoia n’oit, se vesti riçement,
Ad un fil d’oro sua crena destent.
Ela e Bernardo se parti mantenent,
E fo venua da la tenda davent
Page:Anonyme - Macaire, chanson de geste.djvu/468
Le texte de cette page a été corrigé et est conforme au fac-similé.
276
3278—3304
Macaire.
![](http://upload.wikimedia.org/wikipedia/commons/thumb/a/a2/Anonyme_-_Macaire%2C_chanson_de_geste.djvu/page468-1024px-Anonyme_-_Macaire%2C_chanson_de_geste.djvu.jpg)