Page:Anonyme - Macaire, chanson de geste.djvu/479

3398—3424

287

Macaire.

Contre lor vienent chevalier et péon
Savoir noveles s’auront la pais o non.
Varocher voient et o lui l’enfançon
Qui plus biaus ert onc ne fu Asalons.
Le chief ot blont o penne de poon ;(*)
Plus bel dansel onques ne vi nus hon.
Quant sont venu devant le roi Kallon,
Cil les apele, ses a mis à raison :
« Or dites moi de celui enfançon,
« L’avés trové en voie o en boisson ?
« Onc ne vist hom nul plus bel dansillon. » (*)
Et dist dus Naimes : « Quant saurés de son nom,
« Plus l’amerés que les deus iex dou front. »
Oés miracle de Dieu qui fist le tron !
L’enfes se part des bras dou duc Naimon,
A Kallon vient, sel prent par le menton.
« Peres, fait-il, je sai bien la leçon
« Com s’en ala ma mere dou roion.
« Vos fils sui je par droite nation,
« Et se nel crois, qu’en aies sospeçon,
« Véoir poés le signe que portons,
« Sor destre espaule, la blanche crois en son. »
Ot le li rois, s’en apele Naimon :
« Naimes, fait il, oés de l’enfançon.
« Ne puis entendre noient de sa raison.
« Qui est me dites ne de quel region. »
Et dist dus Naimes : « Ja le saurés par nom.