« Tel vos dirai dont grant joie en auront
« Tote la cort, chevalier et péon.
« Jamais en France tel joie ne vist on
« Com vos aurés por le jouene enfançon. »
« Sire emperere, dist Naimes de Baivier,
« Bien vos porrai tel novele conter
« Dont en aurés forment à merveiller.
« Véés vos point ce petit bachelier ?
« Por voir vos di, si le vos puis jurer,
« Que por vo fil bien le poez claimer.
« Si ai véu sa mere Blanchefier(*)
« Avec son pere ù ele ert en son tref.
« N’est mie morte, ains vive et en santé. »
Quant li rois ot la novele conter,
Sor tote rien s’en prist à merveiller :
Dist à Naimon : « Ce ne puis créanter,
« Que, se fust vive, ne poroit endurer
« Sa gent véoir ocire et detrenchier. »
Et dist dus Naimes : « Et vos le puis jurer,
« Que l’ai véue, si me li lut parler. (*)
« La pais est faite, sel volés otrier. »
Dist l’emperere : « Trop longues a targié. »(*)
