Grans fu la joie et mervillose et grans.
En Paris entrent trestuit comunaument,
Et la roïne à la chere riant
A son palais monte lie et joians.
Grans fu la feste à Paris là dedens ;
Dames, pucelles, s’en i vont carolant.
La feste dure .xv. jors en avant.
Li rois à qui Costantinoble apent
Congié demande l’emperéor des Frans,
Cil de Hongrie avec lui ensement.
Il se departent baut et lié et joiant,
Et la roïne laissent au vis riant
Avec Kallon le riche roi poissant.
Tos jors fu pais entre eus d’ore en avant,
Ne mais n’i fu ne noise ne bobans.
L’emperere est en sa cité tornés ;
Ensemble o lui a mené son barné.
Et Loéis, li boins rois coronés,
Est en Hongrie ariere repairés.
Cil de la terre grant joie en ont mené.
Kalles remest à Paris, sa cité,