« Il le convient faire plus sostiment :
« En la fontainne tous nus sera avant,
« Tantdis irons nostre preut porchasant. »
Quanqu’il parloient issi faitierement,
Dist H. : « Que demorés vous tant ?
« Pelerin frere, ci a lonc parlement. »
Et H. en apella Bernier :
« Pelerin frere, trop poés delaier.
— Sire, » dist il, « ne vous chaut d’esmaier,
« Car vostre preut vous vuel je porchacier.
« Il vous convient premerains despoillier,
« En la fontainne antrerés tos premiers. »
Il se despoille, que dras n’i vaut laissier.
Dedens s’en entre, car bien cuide esplotier.
Dist B. : « Sire, par .ix. fois vous plungiés. »
Et il si fist de gré et volentier.
La gentil dame en apella B. :
« Prenés, biax sire, ceste espée d’acier ;
« Tout maintenant la teste li trainchiés.
— Non ferai, dame, par les iex de mon chief ;
« Quar tos jors mais me seroit reprochiés ;
« Hons desnués n’iert ja par moi touchiés.
« Mais montés tost sor cel palefroi chier,
« Je monterai sor cel courant destrier. »
La dame monte, B. li tint l’estrier,
Et il meïsmes monta sans delaier,
Et H. entent a lui baingnier.
Li cuens B. conmensa a huchier :
« Sire H., or pencés del baingnier,
« Et B. enmanra sa mollier. »
H. l’oit, n’i ot que correcier :
« En moie foit, » dist il, « sire B.,
« De si saige home ne se puet on gaitier.
