« Et si m’eüst ocis, c’est verité.
« Plus chier ai je que l’aie decopé
« Que il m’eüst ocis ne afolet.
« Se il est mors, il n’est pas seus tués. »[1]
Et dist li rois : « Mar l’osastes pencer ;
« Jel vous ferai molt bien guerredoner. »
Lors apella son prevost Ysoret :
« Fai me .j. forche sor cel tertre lever.
« Ce pautonnier maintenant me pendés. »
Et cil respont : « Tot a vo volenté. »
Savaris a Juliien resgardet ;
Son pere sanble miex qu’ome qui soit nés
De cors, de vis, et de bouche et de nés.
B. son oncle l’a Savaris monstré :
« Esgardés, sire, por sainte charité,
« Con cis paiens est grans et figurés. »
Et dist B. : « Biax niers, voir dit avés.
« C’il vesquist auques il fesist mal assés.
— Miex vous resanble que home qui soit nés,
« De cors, de vis, et de boche et de nés. »
B. l’entent, si l’an a resgardet :
Dedens son cuer l’a forment enamet.
Derier lui garde, voit .j. viellart plorer,
Ces cheviax ronpre et ces dras dessirer.
Et B. li prist a demander :
« Por quoi fais duel plus que cil autre per ? »
Et il respont : « Bien le vous sai conter.
« J’ai ce jone home et norrit et gardé,
« Que ja verrai devant moi afoler. »
Et dist B. : « Or me dis verité ;
« Se tu en mens, tes jors est ajornés ;
« Se voir en dis, tu seras respassés.
« Est ce tes fis, as le tu engenret ?
— Nannil voir, sire, par sainte charité.
- ↑ 7975 Ms. illest.
