« Quant nous corumes sor la crestiienté,
« Dusqu’a Saint Gile gastames le regnet.
« La le presimes trestot enmaillolet.
« Tant le vis bel qu’il m’en prist grant pités ;
« Ainc ne le vos ocirre n’afoler :
« Nourir l’ai fait et tenir en chierté.
« N’a que .iij. mois que il fu adobés ;
« Puis a .j. roi en bataille maté.
« Onques n’an vot tenir les herités,
« Ains m’a donée trestote l’erité.
« Por ce sui je dolens et esgarés
« Quant je le vois mener a tel vité. »
Quant B. oit de son fil la vertet,[1]
Lors a tel joie c’onques mais nan ot tel,[2]
Mais por paiens ne l’a pas demonstré.
Le roi Corsuble a B. apellet :
« Sire, » fait il, « or oiés mon pencer.
« Servit vous ai a mon branc aceret ;
« Or vuel .j. don que vous le me donés. »
Et dist Corsubles : « De bone volenté :
« Ne quer[r]ois chose qui ja vous soit vée,
« Donjons ne marches, cites ne fermetés. »
Et dist B. : « Aillor ai mon pencer.
« Je vous demant cel viellart rasoté,
« Et se jone home que vous pendre devés. »
Li rois l’entent, si a le chief crolet.
Il li respont : « Tel don m’as demandet,
« [Se] je seüsse ton cuer et ton pencer,[3]
« Nel te donasse por .j. roiauté.
« Seul por itant que le don t’ai donet,
« S’il avoit mort demi mon parentet,[4]
« Cel te donroie de bone volenté. »
Et dist B. : « .V.c. mercis et grés. »
Page:Anonyme - Raoul de Cambrai.djvu/383
Cette page a été validée par deux contributeurs.
272
raoul de cambrai
![](http://upload.wikimedia.org/wikipedia/commons/thumb/3/3a/Anonyme_-_Raoul_de_Cambrai.djvu/page383-1024px-Anonyme_-_Raoul_de_Cambrai.djvu.jpg)