A cet mot est vers Juliien alés ;
Il li demande : « Amis, dont estes nés ? »
Et cis respont : « De Cordes la cité.
« Son fil m’apelle cis viellars rasotés,
« Mais sis con pere je ne le puis amer ;[1]
« Et si m’a l’an maintes fois reprovet
« Que je estoie des crestiiens nés. »[2]
B. l’entent, parfont a sospiret ;
Puis dist en bas, qu’il ne fu escoutés :
« Par Dieu, biau fix, on vous dit verité. »
A icet mot li fist les fers oster,
Puis l’an rapelle con ja oïr porrés :
« Sarrasin frere, ne me soit pas celet :
« Voroies estre baptisiés et levés ?
« Voroies tu renoier le tien dé,
« Mahom et Apolin, Tervagant et Jupé,[3]
« Croire en Jhesu qui en crois fu pennés,
« Qui vint en terre por le pueple sauver ?
« Se tu le vuels servir et honorer,
« Je te ferai garir et respasser. »
Dist Juliiens : « Je cuit vous me gabés.
« Ce dites vous por moi espoenter.
« Et neporquant j’en dirai verité :
« Si m’aïst Diex, je ne desire el. »[4]
B. respont : « Certes, fix, vous l’avés :
« An sains fons fustes baptisiés et levés,
« Au baptisier Juliiens apellés.
« C’estes mes fix, de ma char engenrés. »
Juliie[n]s l’oit, c’est en haut escriés :
« Hé ! Diex aïde ! quant mon pere ai trovet
- ↑ 8043 con, ms. 9me.
- ↑ 8045 Vers trop court ; corr. en crestienté ?
- ↑ 8054 Vers alexandrin qu’il ne paraît pas facile de raccourcir. P.-ê. est-il interpolé, d’autant plus qu’il y a au v. précédent le tien dé au sing.
- ↑ 8062 Il manque probablement ici un vers contenant le mot baptême (Fors qu’en baptesme soie regenerés ?), sans quoi le vous l’avés du vers suivant ne se rapporterait à rien.
