Singnor, voirs est, mentir ne vous an quier,
N’est si grans duels ne convaingne laissier.
Icelui soir ont le conte velliet.
Entor la bierre i ot maint chevallier.
Au matinet, quant vint a l’esclarier,
Chantent la messe et font le Dieu mestier :
Le cors enterrent el cloistre del mostier,
Puis vont a Ancre sus el palais plaingnier,
Et au tier jor a Sain Quentin le sié.
Li .ij. anfans ne s’i sont atargiés :
Parmi lor terres mandent maint chevallier,
Et d’autre part orent maint saudoier
Et maint serjant et maint aubalestrier.
An .viij. jors plains, ce saichiés, sans targier,
Que d’uns que d’autres orent .xxx. milliers.
Et la contesse s’en prist a mervillier,
Ses .ij. anfans en prist a araisnier :
« Singnor, » dist elle, « ou devés chevauchier ?
— Droit vers Arras, » dist Juliie[n]s li fiers,
« La mort mon pere vers le vostre vaingier. »
La dame l’oit, n’i ot que correcier :
« He Diex ! » dist elle, « ne me sai concillier.
« Mi enfant vuellent mon pere vergoingnier :
« C’il les puet panre n’en son pooir baillier
« Il les fera tous les menbres trainchier ! »
Dist Juliiens : « Dame, or le saichiés,
« Se il m’ocit, je l’an quit le pichié. »
Lors fit sa gent d’errer aparillier,
Tot le harnois mener et charroier ;
Et sont montés serjans et escuier.
La gentil dame ala ses fis baisier,
Et ci lor proie, por Dieu le droiturier,[1]
Que c’il prenoient en chanp le sor guerrier,[2]
« Ne l’ociés, ne faites detrainchier :
Page:Anonyme - Raoul de Cambrai.djvu/400
Cette page a été validée par deux contributeurs.
289
raoul de cambrai
