minum tales figuras reformare. Nec istud factum putes ulla benivolentia, sed ut ei redeunti medelam salubrem possem subsistere. Specta denique quàm parvis quàmque futilibus tanta res procuretur herbusculis. Anethi modicum cum lauri foliis immixtum rore fontano datur lavacrum, et poculum.
Hæc idemtidem adseverans, summa cum trepidatione irrepit cubiculum, et pyxidem depromit arcula. Quam ego amplexus, ac deosculatus priùs, utque mihi prosperis faveret volatibus deprecatus ; abjectis propere laciniis totis, avide manus immersi ; et, haurito plusculo uncto, corporis mei membra perfricui. Jamque alternis conatibus libratis brachiis, in avem similem gestiebam. Nec ullæ plumulæ, nec usquàm pinnulæ ; sed planè pili mei crassantur in setas, et cutis tenella duratur in corium ; et in extimis palmulis perdito numero, toti digiti coguntur in singulas ungulas ; et de spinæ meæ termino grandis cauda procedit. Jàm facies enormis, et os prolixum, et nares hiantes, et labia pendula. Sic et aures inmodicis horripilant auctibus. Nec ullum miser reformationis video solatium, nisi quod mihi jàm nequeunti tenere Fotidem, natura crescebat. Ac dùm salutis inopia cuncta
