Vray est qu’ayant entendu qu’on luy préparoit une chambre à la Bastille (où l’on a accoustumé d’emprisonner les princes), j’ay ouy dire que ce jeune prince de Condé a changé du depuis d’avis.
Peu de jours après, on a imprimé, avec privilège du Roy, certains livres mordans et pleins d’injures contre l’amiral, ès quels nommément est disputé et maintenu qu’il a esté loisible au Roy de traiter ainsi ses sujets, pour la religion violée, ne plus ne moins que furent chastiez les sacrificateurs de Baal. Mais de la conjuration de l’amiral, point de nouvelles ; ces livres n’en disent rien de particulier, et les conseillers et courtisans à qui j’en ay parlé avant mon départ (entre autres MM. de Foix et de Mal-Assise) s’en moquent, disant par leur foy que ç’a esté une galante couverture, recognoissant le faict si barbare et diaboliquement cruel qu’on ne luy peut donner autre titre (toutefois, il est mal caché à qui le cul paroist). Mais quoy qu’il en soit, ils disent que le Roy veut qu’on croye qu’il y a eu de la conjuration, et tout ce qu’il y a de bon, c’est qu’ils ont nommé le Roy de Navarre entre ceux que les huguenots vouloyent tuer.
Pour conclusion, par toute la France où le Roy a pouvoir, qui ne veut aller à la messe faut qu’il meure ou qu’il fuye secrètement hors du royaume ; et croit-on que, depuis le 24 d’aoust jusques à maintenant, il y a eu plus de cent mille personnes huguenotes tuées par toute la France, sous prétexte de leur conspiration : encores ne sont-ils pas saoulez, leur cholère n’est point assouvie.
Encore n’est-ce pas tout ; car, comme je disois tantost, quelque grande tuerie qu’il y ait eu en France, la cholère du Roy ne passera jamais pendant qu’il y aura un huguenot en vie ; encore jure-il, par le ventre Dieu, qu’ils ont beau faire, que la messe ne les sauvera jà.
