nommé Des Erables[1], auquel je me fiois bien fort, et dont j’eus du regret : et la malversation de l’escuyer Chaumontel[2] en mes affaires, qu’il avoit tellement embarrassées pour y picorer que tout en estoit en confusion, et principalement en Normandie, me contraignirent d’en donner ma procuration a ma sœur de Tillieres.
Fevrier. — Au mois de fevrier suyvant, l’affaire de Mr le duc de la Valette, quy n’avoit encores qu’esté esbauchée, fut mise sur le tapis, et le 4me jour du mois le roy tint a Saint Germain sur ce sujet un ample conseil ou furent mandés les princes, ducs et officiers de la couronne, et principaux conseillers, et avec eux les sept presidents au mortier du parlement de Paris et le doyen des conseillers ; lesquels messieurs du parlement ayans esté mandés, non en corps, mais chasque particulier par une differente lettre, vindrent premierement tous ensemble, descendirent au logis du sieur de la Ville aux Clercs, secretaire d’estat, quy obtint du roy que l’on leur apprestat a disner par ses officiers, et en suitte eurent de grandes disputes pour leur rang, pretendans qu’ils representoint la court de parlement ; ce que le roy leur ayant desnié et concedé seulement qu’ils auroint seance comme conseillers d’estat suyvant le rang de leur reception, ils ne le voulurent accepter, et aymerent mieux se tenir tous ensemble au dessous des conseillers d’estat, et par consequent opinerent les premiers ; et le doyen ayant esté commandé par le roy de dire son avis,
- ↑ Sans doute un fils de celui qui fut tué en 1621 au siége de Saint-Jean-d’Angély. Voir t. II, p. 285.
- ↑ Voir p. 248, note 2.
