Page:Bedier - La Chanson de Roland.djvu/316

La bibliothèque libre.
Cette page a été validée par deux contributeurs.

Puis fait porter .IIII. bancs en la place :
La vunt sedeir cil kis deivent cumbatre.
3855Ben sunt malez, par jugement des altres,
Sil purparlat Oger de Denemarche ;
E puis demandent lur chevals e lur armes. AOI.

CCLXXX

Puis que il sunt a bataille justez,
Ben sunt cunfès e asols e seignez ;
3860Oent lur messes e sunt acuminiez ;
Mult granz offrendes metent par cez musters.
Devant Carlun andui sunt repairez.
Lur esperuns unt en lor piez calcez,
Vestent osberc blancs e forz e legers,
3865Lur helmes clers unt fermez en lor chefs,
Ceinent espees enheldees d’or mier,
En lur cols pendent lur escuz de quarters,
En lur puinz destres unt lur trenchanz espiez,
Puis sunt muntez en lur curanz destrers.
3870Idunc plurerent .C. milie chevalers
Qui pur Rollant de Tierri unt pitiet.
Deus set asez cument la fins en ert.

CCLXXXI

Dedessuz Ais est la pree mult large.
Des dous baruns justee est la bataille.
3875Cil sunt produme e de grant vasselage
E lur chevals sunt curanz e aates.
Brochent les bien, tutes les resnes lasquent,
Par grant vertut vait ferir l’uns li altre.
Tuz lur escuz i fruissent e esquassent,