dit-il, que ie recommence, ie veux encor dire. Ie luy fis donc faire derechef le ſigne de la Croix, & il ſe prit incontinent à rire, & à ſauter d’aiſe. I’ay veu le meſme vne autrefois pleurer bien fort pour auoir eu le doigt froiſſé, cependant s’appaiſer, & rire, auſſitoſt qu’on luy euſt fait faire le ſigne de la Croix. Ie m’eſtend volontiers ſur ce ſuiet, ne doutant point que les bonnes ames ne prennent plaiſir d’entendre toutes ces particularitez ; dans les commencemens de ceſte Egliſe naiſſante, que pouuons nous raconter ſinon les begayemens de nos enfans ſpirituels ? Nous auons vne petite fille entre autres nõmee Marie Aoſiȣa, qui n’a point ſa pareille ; vous diriez que tout ſon contentement ſoit de faire le ſigne de la Croix, & de dire ſon Pater & l’Auc, à peine auons nous mis le pied dans ſa Cabanne, qu’elle quitte tout pour prier Dieu. Quand nous aſſemblons les enfans pour la priere ou pour le Catechiſme, elle ſe trouue touſiours des premieres, & y accourt plus gayement que pluſieurs ne ſeroient au ieu ; elle ne bouge de chez nous, & ne ſe laſſe point de faire le ſigne de la Croix, & de dire & redire cinquante fois le iour le Pater & Auc; elle le fait faire aux autres, & vn de nos
