ſer, pouſſé à cela, diſoit-il, entre autres motifs, parce que en leur défaite par les Iroquois Dieu luy auoit conſerué extraordinairement la vie.
Le quatrieme de Nouembre nous partiſmes pour aller inſtruire ceſte maiſon, & conſidérer plus exactement la diſpoſition qu’ils auoient à la Foy. En chemin nous baptiſaſmes deux malades, que nous croyons eſtre maintenant dans le Ciel ; nous demeuraſmes ſept iours en noſtre voyage, pendant lequel nous inſtruiſiſmes toute ceſte famille de tous les poincts importants de la Religion Chreſtiene. Louy nous ſeruoit en cela de truchement, lequel poſſede fort bien nos myſteres, & les explique auec affection. Tous approuuoient & gouſtoient grandement les veritez Chreſtiennes, & tant s’en faut qu’ils iugeaſſent aucun des commandemens de Dieu difficiles, que meſmes ils les trouuoient faciles. La continence coniugale, & l’indiſſolubulité du mariage, leur ſembloit deuoir plus empeſcher le progrez de l’Euangile, & en effect ce nous ſera entre autres vne pierre d’achoppement. Cependant ils diſoient qu’eu égard à vne vie eternellement heureuſe, ou eternellement malheureuſe, rien