et les accompaignoit ung nommé Pierre Bauldrée, de Savonières. Lesquelz rompirent les aultelz et painturcs de la dicte église, enportèrent ung calice d’argent, ung cyel de sergelte servant sur le grand autel, les cordes des cloches et plusieurs aultres biens et ornemans d’église. Et depuys ledict jour de la Trinité ne fut célébré messe en ladicte église jusques au mercredi, huictième jour de Juillet. F.n quel temps la commune se emouva et par la permission du roy on fist soner le tocsaint pour amasser la dicte commune.
Et ledict huictiesme jour de Juillet la ville d’Azay fut prinse par la commune, et y fut tué plusieurs des Huguenoz.
Le jeudi, neufviesme jour dudict moys, les Huguenoz de Chinon vindrent audict lieu d’Azay par l’adroisse des aulcuns Huguenoz dudict Azay, et tuèrent plusieurs personnes de la commune, entre aultres ung nommé Messire Jehan Blanchet, prestre, paroissien de Druys, curé d’une paroisse nommée Noustre-Dame du Tatre[1], diosaise de Sainctes.
Le vendredi ensuivant, qui estoit le dixiesme jour dudict moys de Juillet, les Hugnoz sortirent de la ville de Tours et passèrent par Ballau et tuèrent plusieurs de la commune qui estoient assemblez : entre aultres, ung nommé Des Rue, lieutenant du provost des mareschaux, et aultres qui suivoint : le curé de Mons qui avoit assemblé grand nombre de commune pour aller contre lesdicts Hugnoz ; et firent brusler une maison ou dict lieu de Balan.
En ce temps furent baptisés plusieurs enfens es maisons particulières, qui ne sont contenus en ce présent livre, parce que on ne les osoit aporter à l’église ; et plusieurs épousés aussi es maisons particulières pour lesdictes empeschements des Hugnoz, entre aultres ung : jeune homme, nommé Clément Symons, ouvrier en drap de soye, qui épousa la fille de défunct Pierre Barrier, qui aultre foys avoit esté mestre des gasbelles ; ung aultre nommé Mathurin Gasnier, filz de dé-
- ↑ Le Tatre, commune de l’arrondissement de Barbezieux, canton de Baignes, département de la Charente.
