L’emperere de France en apella Forcon.
Amis, ce dist li rois, movez a esperon,
Amenez moi voz oncles et Girart et Doon,
Et me viegnent droit fere au lox de ma meson ;
Et puis venront o moi a Rains ou a Loon.
Et Forques s’en torna sanz point d’arestison ;
De ci au tref de paille n’i ot arestison.
Ses oncles apella, ses a mis a reson :
Baron, et car montez, venez au roi Karlon.
La guerre vos pardone et la destruction.
Quant li baron l’oïrent, n’i font demorison,
Vienent au tref de paile ou troverent Karlon ;
Devant l’empereor sont mis a genoillon,
Merci li ont crié par grant devocion.
Karles les en leva par le los duc Naimon
Et il li pardonerent la mort Buef d’Aigremont.
Entrebesié se sont sanz point d’arestison.
Tuit en loerent Deu et Normant et Breton.
Girart, ce dit li rois, entendez ma reson.
Vos venrez avec moi de ci a Monloon,
Et Forques votre niés et li bons duz Doon.
La tenrai ge ma cort a ceste Ascencion.
Sire, ce dit li duz, votre comant feron.
Dont fu l’ost destravée entor et environ.
Les genz Girart en vont ariere en lor roion,
Et Karles s’en revint ariere a sa meson.
Grant joie li ont fet Poitevin et Gascon
Et Normant et Engloiz et Lombart et Frison.
Grant joie fet li rois, einsi com nos diron.
.XV. rois ot le jor a cele assemblison.
Le jor porta corrone l’emperere Karlon.
Duz Aimes de Dordone i vint a esperon
Et Renaus li siens filz et Aalars li blons
Et Richars et Guichars, por voir le vos dison ;
Et si i fu Maugis, filz duc Buef d’Aigremont.
Segnor, j’ai comenciée une bone chançon ;
Onques meillor n’oïstes, por voir le vos dison ;
Se Karles ot sa joie, or aura marrison
Tele dont il fut puis iriez et maint baron.
Page:Castets - La Chanson des quatre fils Aymon, 1909.djvu/157
Cette page a été validée par deux contributeurs.
145
les quatre fils aymon
![](http://upload.wikimedia.org/wikipedia/commons/thumb/b/b0/Castets_-_La_Chanson_des_quatre_fils_Aymon%2C_1909.djvu/page157-1024px-Castets_-_La_Chanson_des_quatre_fils_Aymon%2C_1909.djvu.jpg)