Et Richars et Guichars que il ot forment chier.
Lor mere la ducoise les fist apareillier,
D’eskarlate vestir à bons mentiaus d’ormier,
Et montent es chevaus qui sunt bon et corsier.
De Dordon departirent li nobile guerrier,
Et sunt en lor compaigne .cccc. chevalier.
Tant vont par lor jornées le grant païs plenier,
Desi que à Paris ne volrent atargier.
Charles fu el palais, l’emperere al vis fier ;
O lui fu Galerans et Naimes et Ogier
Et li rois Salemons et li rois Desier
Et li rois de Hongrie c’on tint à bon guerrier.
Le jor i ot .vii. rois à corones d’ormier
Et .xiiii. archevesques, estre l’autre clergier ;
Onques ne tint tel feste l’emperere au vis fier,
Puis l’eure qu’il porta sa corone premier,
Grant joie i ot menée sus el palais plenier ;
Asses i ont joé Alement et Baivier
Et Normant et Anglois et Breton et Poihier ;
Onques mais tel empires, ce vos pues aficier,
Ne fu mais à Paris logiés sor le gravier.
Ce fu à Pentecoste, une feste joiani,
Que Charles tint sa cort ; onques ne tint si grant ;
Bien .vii. rois coronés i trovissies seant.
Molt fu [grande la cort][1] sus el palais luisant ;
Le jor porta corone l’emperere vaillant ;
Grant joie i ont mené li petit et li grant ;
Mais encui iert en ire trestot li plus joiant,
Que li dus de Dordon, le viel chenu ferrant,
Descendi au perron, sans nul atargement ;
O lui ses .iiii. fils qui furent de jovent.
Atant est descendus chascuns de l’auferrant
Et entrent el palais soef et belement.
Li bacheler vaillant sunt el palais entré ;
Desi au maistre dois ne se sunt aresté.
Li dus s’en vint avant, c’on tint à molt sené,
Et salue [le roi][2] de bone volenté ;
