Et vint en la valée de dejoste le mont,
Et a trové gisant Richart sor le sablon.
La boiele ot sortie sor l’ermin peliçon ;
Par la plaie li pert le foie et le pomon.
Qant Renaus l’a veü, si grant duel n’ot nus hom.
Il li ala baisier le bouce et le menton ;
Durement le regrete Renaus, li fix Aymon.
« Ahi ! dist-il, Richart, jantis fix à baron,
Tant mar fu vostre cors, vostre gente façon !
Unques nesun de nos tant ne fu coragos ;
Mort t’a par grant pecié li rices rois Yon,
Ki si nos a traïs et mis en tel dolor.
Mais se ja Dex donoit, par sa beneïçon,
Que escaper peüsse, sans nule arestison,
Je le ferai ardoir en un fu de carbon.
Ne le poroit garir tos li ors de cest mont.
Hé Dex ! ce dist Renaus, biax pere glorios,
Hui main estiens .iiii., tuit chevalier baron,
[Engendré d’]une mere, molt nos entramion ;[1]
[Or ne som]es que .iii. ici en sospeçon. »
[Ata]nt es Aallart desconfit de l’estor,
[Et dant] Guichart, son frere, broçant à esperon ;
Durement les encauce et Normant et Breton.[2]
Aallars s’escria : « Renaus, ke faites vous ?
Montes sor cel ceval, si nos faites sozcors. »
Richars les entendi, ki gisoit el sablon,
Et a dit à ses freres : « Ci ke demores vos ?
Vees là une roce, à un jet d’un baston ;[3]
.vii.m. pierres i a rengies environ.
Se vos tant poes faire que [n]os iluec soion,[4]
Je cuit, par aventure, qu’encor i gariron.
Page:Castets - La Chanson des quatre fils Aymon, 1909.djvu/520
Apparence
Le texte de cette page a été corrigé et est conforme au fac-similé.
492
les quatre fils aymon