Toute m’ost en ferai arriere retorner.
« Sire, ce dist Ogiers, si com vos comendes ;
Mais ne sai s’aurons garde de Renaut l’aduré. »
« Ahi ! dist Charlemaignes, con vos le redoutes ! »
Ogiers et l’arcevesques sont es chevaus montés,
Et Namles et Estous qui sunt del parenté,
Et sunt issu de l’ost, si sunt acheminé,
Et passent Balençon, le rivière et le gué.
Desi à Montauban ne sunt aseüré,
Et vienent sor le pont, s’ont le portier crié.
Li portiers les perçoit, s’a le pont avalé ;
Venus est au guicet, s’a le verroil tiré.
Defors a mis son chief, s’a nos barons visé.
« Seignor, qui estes vos qui sor cest pont montes ? »
« Nos somes home Charle », dist Namles li barbés.
Va, si nos di Renaut qu’il viengne à nos parler.
Di li que ce est Namles et Torpins l’ordenés
Et Ogiers li Danois et Estous li membrés. »
« Sire, dist li portiers, je lor dirai asses. »
Atant s’en monta cil contremont les degrés ;
Venus est en la sale, si a Renaut trové.
Li portiers s’agenoille et si li a conté :
« Sire, là defors sunt chevalier honoré. »
« Qui sunt il ? dist Renaus, garde nel me celer. »
« C’est Namles li cortois et Estous li membrés,
Et Ogiers li Danois et Torpins l’ordonés. »
Comme Renaus l’oï, si est en piés levés,
Et a dit a ses freres : « Panses de l’onorer. »
« Sire, ce dist Maugis, or aves bien parlé.
Molt seront bien servi, s’il wellent sejorner. »
« Seignor, ce dist Renaus, or oons lor pensé. »
Il vienent à la porte, s’ont le pont avalé.
Quant Richars voit les contes, si les va saluer,
Et Renaus les corut bonement acoler.
« Molt faites que cortois que veoir nos venes.
Bien soies vos venu, seignor, en la ferté.
Cist chastiaus est tos vostres, se prendre le voles. »[1]
- ↑ 11835 C’est toute la courtoisie castillane.