Namles en entra ens et Ogiers l’alosés,
Estous li fils Œdon et Torpins l’ordené.
El palais sunt venu, si montent les degrés.
A l’estrier va Renaus por Namlon honorer ;
Aallars et Guichars à Turpin l’ordené,
Et Richars et Maugis vont à Ogier le ber ;
Trestot se painent molt des contes honorer.
Et la franche ducoise devale le degré ;
Elle corut Ogier baisier et acoler,
Et duc Namlon de France et Torpin l’ordené ;
Forment a les barons servis et honorés.
« Renaut, ce dist Ogiers, s’il vos plaist, or oes.
Nos vos avons forment servis et honorés,
Et esté en vo liu por vostre honor garder ;
Mais Maugis, vos cousins, nos a molt vergondés.
Nos l’avions plegié vers Charlon l’aduré,
Et il s’en vint par nuit, coiement, en emblé.
Si nos a vers le roi malement encoupés
Por la corone Charle que il en a porté ;
Et l’espée Rollant n’ot il pas oblié,
L’Olivier Hauteclere qui tant vos a amé.
Or vos mende li rois, gardes que vos feres,
Que la corone et l’aigle bonement li rendes,
Et les brans as barons, dont il est molt irés ;
Et il vos donra trives jusqu’à .i. an passé ;
Si en fera ses os arriere retorner. »
« Sire, ce dist Maugis, à vostre volenté.
Nos en ferons tot çou que vos comenderes.
Vos remanres huimais, o nos sejorneres,
Et nos prendrons conseil de çou que vos queres. »
Et Ogiers respondi : « Si iert com vos vodres. »
Et Maugis s’en torna, s’avale les degrés,
Et vient en la cuisine, s’a le keu apelé.
« Amis, ce dist Maugis, à moi en entendes.
Je vos comant molt bien, gardes n’i oblies,
Que il n’ait chevalier là desus, au disner,
Des mesages Charlon qui ci sunt assemblé,
Ki n’ait .i. grant paon devant lui enpevré,[1]
- ↑ 11873 B M bon paon rosti et bien pevré.
