Sire, car me plegies vers Charlon l’aduré ;
Et vos, sire Richars de Ruhem la cité. »
« Sire, molt volentiers, desor nos iretés. »
« Sire rois, dist Renaus, aves en vos asses ?
Encor en aures plus, se vos le comendes. »
« Voire, dist Ydelons, asses en troveres. »
« Asses en ai, dist Charles, car au jor esteres ;
Car je vos ferai voir estroitement garder. »
« Sire, ce dist Rollans, par mon chief non feres ;
Ains l’en laires molt bien à Montauban raler.
Il vos a doné plege, tant comme vos voles ;
Bien puet prendre ses armes et Baiart autretel. »
« Par foi, ce dist Ogiers, o lui m’en weil raler ! »
« Et je, » ce dist dus Names et Torpins l’ordenés.[1]
« Sire rois, dist Renaus, à moi en entendes.
Qui sera champions contre moi au joster ? »
« Par mon chief, dist li rois, mes cors que ci vees.
Je ferai la bataille contre vos en cel pré. »
« Sire, ce dist Rollans, s’il vos plaist, non feres.
Ains la fera mes cors, ki ci sui aprestés. »
« Sire, ce dist Renaus, et çou soit de par Dé.
Oliviers de Viane, por mon cors remanes,
Et vos, sire Richars et Ydelons li bers. »
« Sire, dist Oliviers, à Dame Deu ales. »[2]
Adonc monte Renaus et Aallars li bers
Et Ogiers li Danois et Torpins l’ordenés
Et li rices barnages qui molt fait à loer.
.iii. mile chevaliers en ont o eus menés ;
Desi à Montauban ne volrent arester.
Ils descendent à terre sos le pin au degré ;
Encontre vait Guichars et Richars li mambrés,
Et Maugis ensement, qui molt fait à amer.
Il demandent Renaut : « Comment aves erré ? »
Page:Castets - La Chanson des quatre fils Aymon, 1909.djvu/683
Le texte de cette page a été corrigé et est conforme au fac-similé.
655
les quatre fils aymon
![](http://upload.wikimedia.org/wikipedia/commons/thumb/b/b0/Castets_-_La_Chanson_des_quatre_fils_Aymon%2C_1909.djvu/page683-1024px-Castets_-_La_Chanson_des_quatre_fils_Aymon%2C_1909.djvu.jpg)