« Par foi, dist Aallars, nos fusmes malmené.
Li rois nos fist tos prendre et à sa part torner. »
« Que fist donques Ogiers et Names li barbés ? »
« Par foi, ce dist Renaus, n’en oserent parler. »
« En non Deu, dist Ogiers, si fis au desfier ;
Entre moi et Namon que vos ici vees,
Rendismes son homage et fusmes desevré. »
Celé nuit ont veillié tant qu’il fu ajorné,
Que il vont oïr messe au mostier saint Dié.[1]
Quant messe fu cantée et li mestiers finés,
Renaus vesti l’auberc, si a l’elme fermé
Et a çainte l’espée au senestre costé,
Et pandi à son col .i. fort escu bouclé,
Et tient entre ses mains .i. fort espié karré,
A .ii. clos de fin or le confanon fermé,
Et monta sor Baiart, le bon destrier faé.
« Aallars, dit Renaus, Montauban garderes,
Et Richars et Guichars, li vasal aduré.
Ogiers venra o moi et Names li barbé,
Estot, li fius Œdon et Torpin l’ordené. »
« Par foi, dist Aallars, por noiant en parles.
Awec vos en irons rangié et tot armé.
Si verrons la bataille, coment vos le feres ;
Se vos aves mestier, à nos recovreres. »
« C’est biens, ce dist Ogiers, se faire le voles,
Et Maugis remenra por le chastel garder. »
« Seignor, ce dist Maugis, si soit com dit aves. »
Or s’en torne Renaus garnis et ferarmés,
Entre lui et ses homes et rangiés et serrés ;
Desi à Montfaucon ne finerent d’errer.
Là descendi Renaus desos .i. bos ramé ;
Sa baniere ficha illuec enmi le pré.
Son bon destrier Baiart a illuec areiné,
Et Ogiers et si home sunt illuec aresté.
Or dirons de Rollant, le chevalier loé ;
Au mostier s’en ala le service escouter ;
Molt fu riche l’ofrande qu’il mist desor l’autel,
- ↑ 12167 Noter la mention de ce monastère.
