Antor lui sa maisnie qui à pain font asau[t].[1]
« Baron, dist li hermites, or faites chiere bele ;
Ancui aura chascuns chapon en l’escuele,[2]
Tout maugré Charlemaigne qui contre vos revelle. »
« Grans mercis, dist Renaus, ci a bone novele,
Et puis nos an iron à la lune plus bele ;[3]
[Que je dout molt le roi et sa mesnie isnele][4]
Que çaiens ne nos sache par aucune favele.
En Tremoigne en irai, an ma citei plus bele ;
Se Charles me requiert et sa gent atropele,
Laens me desfendrai an ma maistre tor[ele]. »[5]
Icil jor sejornerent et [aeisié] se sunt.[6]
Baiars ot de l’avaine que dessiré ot mont.[7]
Quant Diex dona la nuit, demorée [ne] font ;[8]
Il sont mis au chemin et par le bos s’en vont.
L’ermite ot .ii. chevax que il mené en ont.
La douchesse en ot un qui gros fu et reon[t][9]
[Et] li [dui] enfant [l’autre] où bien ampleié sunt.[10]
Ensinc s’en vont la nuit parmi lo bos parfont :
Il s’en vont lo regné, ja [n’i arresteront],[11]
Eins se vont chevauchant, com ge ore vos cont ;
[Tant tindrent] lor jornées et aval et amont[12]
Qu’il vindrent à Tremoigne et au palais [reont].[13]
Par tote [la contrée] les noveles en vont[14]
Que venus est Renaus que il tant amé ont ;
Li borjois i accorrent et grant joie li font.[15]
- ↑ 13836 Lettre rognée.
- ↑ 13838 L en l’escuelle. A M en s’escuelle.
- ↑ 13841 M Semprez nous en iron quant loera l’abele.
- ↑ 13842 Sic M. A Car mont redout K. le roi de la Chapelle. L manque.
- ↑ 13846 Lettres rognées.
- ↑ 13847 Sic M. L aassis.
- ↑ 13848 L mlt pour mont.
- ↑ 13849 L en. M n’i.
- ↑ 13852 L reon.
- ↑ 13853 L Li duz enfant les autres.
- ↑ 13855 L ja niess arrestont.
- ↑ 13857 Sic M. L Il ont drecié.
- ↑ 13858 L mot rogné. A M ou grant palaiz reont.
- ↑ 13859 L tere. M contrée. Cf. v. 13862.
- ↑ 13861 M Li baron Cf. v. 13865.
