Premier que leſdicts Montaignez partiſſent pour aller à la guerre, ils s’aſſemblerent tous, auec leurs plus riches habits de fourrures, caſtors & autres peaux, parez de patenoſtres & cordons de diuerſes couleurs, & s’aſſemblerent dedans vne grand’place publique, où il y auoit au deuant d’eux vn Sagamo qui s’appeloit Begourat, qui les menoit à la guerre ; & eſtoient les vns derrière les autres, auec leurs arcs & fleſches, maſſues & rondelles, de quoi ils ſe parent pour ſe battre ; & alloient ſautant les vns après les autres, en faiſant pluſieurs geſtes de leurs corps, ils faiſoient maints tours de limaçon. Après, ils commencèrent à danſer à la façon accouſtumée, comme i’ay dict cy-deſſus ; puis ils firent leur tabagie, & après l’auoir faict, les femmes ſe deſpouillerent toutes nuës, parées de leurs plus beaux matachias, & ſe meirent dedans leurs canots ainſi nuës en danſant, & puis elles ſe vindrent mettre à l’eau en ſe battant à coups de leurs auirons, ſe iettant quantité d’eau les vnes ſur les autres. Toutesfois elles ne ſe faiſoient point de mal, car elles ſe paroient des coups qu’elles s’entre-ruoient. Après auoir faict toutes ces ceremonies, elles ſe retirèrent en leurs cabanes, & les ſauuages s’en allèrent à la guerre contre les Irocois.
Le ſeizieſme iour d’aouſt, nous partiſmes de Tadouſac, & le 18. dudict mois arriuaſmes à l’iſle Percée, où nous trouuaſmes le ſieur Preuert, de Sainct Malo, qui venoit de la mine où il auoit eſté[1] auec
- ↑ Le sieur Prévert n’avait point vu par lui-même ce qu’il rapporte ici à Champlain ; il s’était contenté d’envoyer deux ou trois de ses hommes, avec quelques sauvages, à la recherche des mines. Il ne faut donc pas s’attendre à trouver beaucoup d’exactitude dans tout ce récit. « Il nous faut, » dit Lescarbot, liv. III, ch. XXXIII, « retourner quérir Samuel Champlein… afin qu’il nous diſe quelques nouvelles de ce qu’il aura veu & ouï parmi les ſauvages… Et afin qu’il ait vn plus beau champ pour réjouir
