Page:Charles d Orléans - Poésies complètes, Flammarion, 1915.djvu/322

CHANSON LXX.
Traître regart, et que fais tu
Quant tu vas souvent in questu?
Tu fiers sans dire : garde toy ;
Et ne scés la raison pourquoy,
N’il ne t’en chault pas ung festu.
Tu es de couraige testu
Et de fureur trop in estu.
Change ton propos et me croy,
Traître regart, et que fais tu
Quant tu vas souvent in questu ?
Tu fiers sans dire : garde toy.
On te deust batre devestu
Par my les rues cum mestu,
Par l’ordonnance de la loy;
Car tu n’as leaulté, ne foy,
On le voit in tuo gestu,
Traître regart, et que fais tu !
CHANSON LXKI.
Ma seule amour que tant désire,
Mon reconfort, mon doulx penser,
Belle, nompareille, sans per,
Il me desplaist de vous escrire.
Car j’aymasse mieulx à le dire
De bouche , sans le vous mander,
Ma seule amour que tant désire ,
Mon reconfort, mon doulx penser.
Las ! or n’y puis je contredire,
Mais Espoir me fait endurer,