<poem style="margin-left:6em; font-size:100%"> CHANSON CXVIII. Saint Valeiitin, quant vous venez En Karesme au commancement, Receu ne serez vrayement Ainsi que acoustumé avez. Soussy et Penance amenez. Qui vous recevroit lyement, Saint Valentin, quant vous venez En Karesme au commancement . Une autreffoiz vous avancez Plus tost, et alors toute gent Vous recuilliront autrement; Et pers à choisir amenez, Saint Valentin, quant vous venez. CHANSON CXIX. Saint Valentin dit : Veez me çà. Et apporte pers à choisir ; Viengne qui y devra venir, C’est la coustume de pieçà. Quant le jour des Cendres « hola » Respond, auquel doit on faillir? Saint Valentin dit : Veez me çà, Et apporte pers à choisir. Au fort, au matin convendra En devocion se tenir. Et après disner à loisir Choississe qui choisir vouldra, Saint Valentin dit :Veez me çà.
