<poem style="margin-left:8em; font-size:100%"> RONDEAU CCXVI. Je vous entens à regarder, Et part de voz pensers congnois, Essayé vous ay trop de fois, De moy ne vous povez garder. Guidez vous par voz motz farder, Mener les gens de deux en trois! Je vous entens à regarder, Et part de voz pensers congnois. Vous savez tirer et tarder, Raige faittes et feu Gregois ; Bien gangnez voz gaiges par mois, Parachevez sans retarder. Je vous entens à regarder.
RONDEAU CCXVII. Plus de desplaisir que de joye, Assez d’ennuy, souvent à tort. Beaucoup de soussy sans confort, Oultraige de peine, oîi que soye ! Trop de douleur à grant montjoye, Foison de trespiteux rapport ! Plus de desplaisir que de joye. Assez d’ennuy, souvent à tort ! Tant de grief que je ne diroye ; Mains amant ma vie, que mort ; Pis que mourir, n’est ce pas fort ? Telz beaulx dons fortune m’envoye. Plus de desplaisir que de joye !
